Киҷее Хакас поэзиязының кӱні улуғ пайрам чіли ирт парды Хакасияның чайаачылар туразында. Анда Валерий Майнашевтің кибелістерін хығырчатханнарның аразында иртчеткен «Кӱмӱс тӱстер» хакас поэзиязының республика синіндегі марииның тӱгенҷі чардығы ирткен. Ол марығда кічіг олғаннарнаң пасти улуғларға теере араласханнар. Иң кічіг палаа 7 час полған, иң улиина - 77 час.
Олар прайзы Валерий Майнашевтің кибелістерін хығырарға хакас кип-азахтығ килгеннер, хызыҷахтар узун сӱрместіг, ууҷалар поғолығ паза узун сур ызырғалығ полғаннар.
Марығда олғаннарның кӧбізі «Хорлаңа» кибелісті толдырғаннар, улуғлар, тізең, чӱрекке чағын кибелістерні. Олғаннарның піреелері хай пірее сӧстерге пазымнарны алай ба ударениелерні саба турғызыбыссалар даа, кибелістерні матлама чоохтааннар. Ууҷалар полған на сӧсті, чӱректең сығарчатхан чіли, искіргеннер.
Пу марығда араласчылар частары хоостыра 4 пӧлікке чарылғаннар. Оларның полғанында ла 1 ле чиңісчі табылған. Ӏди 7-10 частығ олғаннар аразында чиңіске Кызластағы ортымах школаның 4-ҷі класс ӱгренҷізі Марк Санзараев сыххан, 11-14 частығлар аразында — Николай Катановтың адынаң хакас гимназия-интернадының 5-ҷі “В” класс ӱгренҷізі — Милослава Сербигешева, 15-17 частығлар аразында чиңіске Ӱс чулдағы ортымах школаның 11 класс ӱгренҷізі Ольга Томочакова артыхтары пол парғаннар. Улуғлар аразында кибелісті прайзынаң артых Михаил Кильчичаковтың адынаң литература музейінің устағҷызы Надежда Никифоровна Боргоякова чоохтабысхан.
Паза Майнашевтер сӧбірезінең алынҷа сыйых полған. Анзы Ағбандағы «Дашенька» олған садының воспитательі Сарима Романовна Тюреневаа пирілген. Чарғыҷылар кнезі Зинаида Семеновна Аршанова пу марығны піди паалапча.#ХакасРадио
